Hjartað sterkara eftir sundsprett í ísilögðu Laugarvatni

Prófessor í íþróttafræði sem er einn þeirra sem baðar sig vikulega í Laugarvatni þrátt fyrir að vatnið sé nú ísilagt segir að sundið sé heilsusamlegt og styrki hjartað. Sundmennirnir hugumprúðu lofa allir áhrif sundsins á líkama og sál.

Laugarvatn er við frostmark þessa dagana og að hluta til ísilagt. Það hefur hins vegar ekki stöðvað hópinn sem hefur vanið komur sínar í vatnið einu sinni til tvisvar í viku.

„Hjartað verður miklu sterkara eftir svona bað tvisvar í viku. Allt jákvætt,“ segir Erlingur Jóhannsson, prófessor í íþrótta- og heilsufræði við Háskóla Íslands á Laugarvatni, sem telur kalt vatnið gott fyrir líkamann.

Í sama streng taka sundfélagar hans.

„Þetta setur af stað svona hormónaflæði þannig að vellíðunarhormón eins og endorfín og seratónín og allt þetta fer af stað,“ segir Birna Ásbjörnsdóttir, einn sundgarpanna.