Ferðamenn hunsa lokunarskilti við Gullfoss

Ferðamenn við Gullfoss virðast hunsa lokunarskiltið sem hefur verið komið þar fyrir. Á myndbandi sem Vísir fékk sent í gær má sjá fjölda ferðamanna ganga niður að fossinum og út á klettinn sem er við fossinn, þrátt fyrir að svæðinu hafi verið lokað vegna hættulegs ástands sökum hálku.

Umræddir ferðamenn klifruðu yfir hlið sem stígnum að Gullfossi hafði verið lokað með. Á því hliði er skilti og á því er varað hættulegu ástandi og tekið fram að það varði lög að fara fram hjá því.

Petra Albrecht, frá Hollandi sem keyrir fyrir Grayline, tók meðfylgjandi myndband við Gullfoss í gær. Hún segir að fólk hafi ítrekað klifrað yfir lokunarskiltið eða farið í gegnum girðinguna á þeim tuttugu mínútum sem hún var á svæðinu.

Þó mjög hált hafi verið segist Petra ekki hafa séð neinn detta.