Almar látinn fara sem framkvæmdastjóri Samtaka iðnaðarins

Stjórn Samtaka iðnaðarins (SI) hefur ákveðið að segja Almari Guðmundssyni, sem hefur verið framkvæmdastjóri Samtaka iðnaðarins síðastliðin þrjú ár, upp störfum hjá samtökunum. Var Almari tilkynnt um þessa ákvörðun stjórnar SI fyrr í dag, samkvæmt heimildum Vísis.

Almar lætur af störfum frá og með deginum í dag og mun Jón Bjarni Gunnarsson gegna starfi framkvæmdastjóra tímabundið. 

Ragnar Guðmundsson, forstjóri Norðurál og stjórnarmaður í SI, sagðist í samtali við Vísi ekkert geta tjáð sig um málið og vísaði á Guðrúnu Hafsteinsdóttur, formann stjórnar samtakanna. Ekki hefur náðst í Guðrúnu þrátt fyrir ítrekaðar tilraunir.

Almar, sem er hagfræðingur og með MBA-gráðu frá London Business School, var ráðinn framkvæmdastjóri SI í ágúst 2014. Hann tók við starfinu af Kristúnu Heimisdóttur sem var sagt upp störfum eftir að hafa verið framkvæmdastjóri samtakanna í aðeins átta mánuði.

Almar hafði áður verið framkvæmdastjóri Félags atvinnurekenda á árunum 2009 til 2014.

Uppfært klukkan 17:01

Í tilkynningu frá SI segist stjórnin harma það að fréttir af ákvörðuninni hafi birst í fjölmiðlum áður en formleg tilkynning um hana var send út frá samtökunum.

Haft er eftir Guðrúnu Hafsteinsdóttur í tilkynnningunni: „Stjórn Samtaka iðnaðarins vill færa Almari Guðmundssyni kærar þakkir fyrir störf hans fyrir samtökin sem hann hefur gegnt af trúmennsku og dugnaði. Almar hefur tekið þátt í miklu umbreytingarstarfi hjá samtökunum og gegnt lykilhlutverki í að auka slagkraft þeirra og sýnileika. Stjórnin mat það hins vegar sem svo að þetta væri rétti tímapunkturinn til að leita að nýjum aðila til að leiða daglegt starf samtakanna og byggja ofan á góðan árangur Almars.“

Þá þakkar stjórnin honum góð störf síðustu ár í þágu samtakanna og óskar honum velfarnaðar á nýjum vettvangi.