48 ára bið á enda hjá íslensku körfuboltafjölskyldunni

Íslenski körfuboltaheimurinn var búinn að bíða í rétt tæpa hálfa öld eftir að eignast íþróttamann ársins þegar Jón Arnór Stefánsson var kosinn íþróttamaður ársins 2014 í hófi Samtaka íþróttafréttamanna á laugardagskvöldið.

Jón Arnór fékk frábæra kosningu og meira en hundrað stigum meira en næsti maður sem var knattspyrnumaðurinn Gylfi Þór Sigurðsson, sem var kosinn íþróttamaður ársins í fyrra.

Jón Arnór átti frábært ár, átti stórleik þegar íslenska landsliðið tryggði sér sæti í úrslitakeppni stórmóts í fyrsta sinn og spilaði síðan með tveimur liðum í sterkustu deild í heimi.

Góð frammistaða Jóns Arnórs með íslenska landsliðinu í undankeppni EM tryggði honum samning hjá Unicaja Malaga, einu besta körfuboltaliði Evrópu.

Hér á síðunni má bæði sjá yfirlit yfir það körfuboltafólk sem hefur komist næst því að vera kosið íþróttamaður ársins á þessum 48 árum sem eru liðin síðan Kolbeinn Pálsson handlék styttuna sem íþróttamaður ársins 1966.

Auk þessa fengum þrjá kunna íslenska körfuboltaþjálfara, sem þekkja Jón Arnór betur en flestir, til að segja okkur frá því hvað gerir íþróttamann ársins 2014 að svona góðum körfuboltamanni.

Besti árangur körfuboltafólks í kjöri Íþróttamanns ársins:

Þorsteinn Hallgrímsson í 2. sætið árið 1964

Fyrsti körfuboltamaðurinn sem komst í efstu tvö sætin en þetta ár var hann langstigahæstur á Norðurlandamótinu og talinn af blaðamönnum á mótinu vera í hópi bestu leikmanna Evrópu.

Fyrir ofan: Handboltakonan Sigríður Sigurðardóttir.



Kolbeinn Pálsson Íþróttamaður ársins 1966

Fyrsti körfuboltamaðurinn sem var kosinn Íþróttamaður ársins en hann var hetja íslenska körfuboltalandsliðsins í sigri á Dönum í framlengingu á Norðurlandamótinu í Danmörku. Kolbeinn stóð sig einnig afar vel með KR á móti Evrópumeisturum Simmenthal frá Mílanó auk þess að vera lykilmaður á bak við Íslandsmeistaratitil KR-inga.



Pétur Guðmundsson í 2. sæti 1981

Varð fyrsti Íslendingurinn sem spilaði í NBA-deildinni þegar hann var valinn af Portland Trail Blazers í nýliðavalinu 1981. Pétur var einnig valinn besti leikmaður C-keppni Evrópumótsins í Sviss þar sem hann varð með 26,5 stig í leik. Pétur varð líka bikarmeistari með Val á árinu eftir frábæra frammistöðu í úrslitaleiknum.

Fyrir ofan: Kraftlyftingamaðurinn Jón Páll Sigmarsson.



Pétur Guðmundsson í 5. sæti 1986

Fékk samning hjá NBA-meisturum Los Angeles Lakers og varð um vorið fyrsti Íslendingurinn sem spilar í úrslitakeppni NBA. Pétur var varamaður miðherjans Kareem Abdul-Jabbar, og nýtti 59 prósent skota sinna í úrslitakeppninni.

Fyrir ofan: Eðvarð Þór Eðvarðsson (sund), Arnór Guðjohnsen (knattspyrna), Guðmundur Guðmundsson og Kristján Arason (handbolti).



Jón Arnór Stefánsson í 4. sæti 2005 og 2007

Jón Arnór varð tvisvar í fjórða sæti með tveggja ára millibili.

Árið 2005 var hann Evrópumeistari með liði sínu Dynamo Sankti Pétursborg og valinn í byrjunarlið Evrópuúrvalsins í Stjörnuleik FIBA Europe.

Árið 2007 samdi Jón Arnór við ítalska stórliðið Lottomatica Roma og spilaði fyrstur Íslendinga í Euroleague. Hann var í lykilhlutverki hjá ítalska liðinu í bæði vörn og sókn.  

Fyrir ofan 2005: Eiður Smári Guðjohnsen (knattspyrna), Guðjón Valur Sigurðsson (handbolti) og Ásthildur Helgadóttir (knattspyrna).

Fyrir ofan 2007: Margrét Lára Viðarsdóttir (knattspyrna), Ólafur Stefánsson (handbolti) og Ragna Ingólfsdóttir (badminton).  



Helena Sverrisdóttir í 4. sæti 2009

Helena var í aðalhlutverki hjá liði TCU sem komst í úrslitakeppni háskólaboltans í Bandaríkjunum. Lykilmaður landsliðsins þar sem hún varð annar stigahæsti leikmaður B-deildar Evrópukeppninnar og sú sem gaf flestar stoðsendingar.

Fyrir ofan: Ólafur Stefánsson (handbolti), Eiður Smári Guðjohnsen (knattspyrna) og Þóra Helgadóttir (knattspyrna).



Jakob Örn Sigurðarson í 3. sæti 2011

Jakob varð sænskur meistari með Sundsvall. Jakob tryggði liðinu oddaleik með ævintýralegri 3 stiga körfu og í úrslitaleiknum skoraði hann 31 stig og var stigahæsti leikmaður Sundsvall. Hann komst einnig í úrvalslið Norðurlandamótsins.

 

Fyrir ofan: Heiðar Helguson (knattspyrna) og Ásdís Hjálmsdóttir (frjálsar íþróttir).



Jón Arnór Stefánsson í 4. sæti 2013

Lykilmaður hjá Zaragoza-liðinu í ACB-deildinni á Spáni sem komst óvænt í undanúrslit úrslitakeppninnar. Magnaður á móti Búlgaríu í Höllinni þar sem hann skoraði 32 stig þegar íslenska liðið var aðeins hársbreidd frá því að komast áfram.

Fyrir ofan: Gylfi Þór Sigurðsson (knattspyrna), Aníta Hinriksdóttir (Frjálsar íþróttir) og  Guðjón Valur Sigurðsson (Handbolti).