Krefst þess að stjórnendur sæti ábyrgðar

Þorsteinn Már Baldvinsson vill að æðsta stjórn Seðlabanka Íslands axli ábyrgð á þeirri rannsókn sem hann og aðrir starfsmenn Samherja sætti vegna meintra brota á gjaldeyrislögum og kalli menn til ábyrgðar til að tryggja að svona lagað endurtaki sig ekki. „Ég hyggst senda bankaráði opið bréf þess efnis á næstu dögum,‟ segir Þorsteinn Már í bréfi sem hann sendi starfsmönnum fyrirtækisins í byrjun vikunnar. Hann hefur sakað seðlabankastjóra um að hafa rekið málið af illvilja.

Eins og greint var frá í fréttum Stöðvar 2 í lok síðustu viku var rannsókn á meintum brotum felld niður. Þorsteinn og aðrir starfsmenn hafa alltaf neitað sök. Hafði Samherja meðal annars verið gefið að sök að selja fisk til dóttturfyrirtækis í Englandi á undirverði.

Í yfirlýsingu sem Seðlabankinn sendi fjölmiðlum á föstudaginn segir að í niðurstöðu sinni sem sérstakur saksóknari kynnti bankanum sl. föstudag geri embætti sérstaks saksóknara ekki athugasemd við að kærð háttsemi geti talist brotleg við lög. Hins vegar sé erfitt að mati embættisins að heimfæra sakarefnin með óyggjandi hætti upp á einstaka fyrirsvarsmenn.

Þorsteinn Már segir aftur á móti að ákvörðun sérstaks saksóknara byggist á efnislegri niðurstöðu

Í bréfi sérstaks saksóknara sé fundið að því að bankinn skuli búa til ný hugtök sem fyrirfinnast ekki „í lögum um gjaldeyrismál eða neinni annarri íslenskri löggjöf né að það væri á annað borð þekkt í íslenskri réttarframkvæmd“.