Kauphallarvélmenni nýttu sér Reuters klúður

Reuters fréttaþjónustan hefur viðurkennt að hafa klúðrað útsendingu á tölum um iðnaðarframleiðsluna í Bandaríkjunum (ISM index) fyrir viku síðan. Tölurnar fóru aðeins 15 millisekúndum of fljótt í loftið en það gátu kauphallarvélmenni, það er hraðvirk tölvukerfi, nýtt sér.

Kauphallarvélmennin sem hér um ræðir geta framkvæmt milljónir viðskipta á hverri mínútu. Þau voru forrituð til að nýta sér strax hinar nýju tölur og á þessum 15 millisekúndum sem liðu áður en ISM vísitalan fór opinberlega í loftið náðu þau að velta 28 milljónum dollara eða um 3,4 milljörðum kr. á þessum skamma tíma.

Í frétt um málið hjá CNBC segir að hinar nýju tölur hafi sýnt neikvæða þróun og því samsvarandi áhrif á markaðinn sem sást nokkrum sekúndum eftir að þær urðu opinberar. Því höfðu eigendur viðkomandi kauphallarvélmenna ákveðið forskot á markaðinn á þessu sekúndubroti.

Til að sýna hve 15 millisekúndur líða hratt má nefna til samanburðar að það tekur á bilinu 300 til 400 millisekúndur að blikka auga.

Reuters er með samkomulag við útgefendur ISM vísitölunnar um birtingu hennar. Fram kemur í frétt CNBC að bæði fréttaþjónustan og útgefendurnar líti á þetta klúður sem minniháttar.