Ritvélar klingja sitt síðasta

Síðasta ritvélin sem framleidd hefur verið í Bretlandi var gefin Vísindasafninu í London fyrir skömmu.

Brother-framleiðandinn, sem gaf síðustu vélina, segist hafa framleitt 5,9 milljónir ritvéla frá því að verksmiðjan var opnuð í Wrexham árið 1985. Edward Bryan, sem starfaði í verksmiðjunni frá árinu 1989, smíðaði síðustu vélina.

„Ef fólk spyr mig get ég alltaf sagt að ég hafi smíðað síðustu ritvélina í Bretlandi," segir Bryan. Hann segist hafa smíðað svo margar vélar í gegnum tíðina að hann hafi eitt sinn reynt að smíða eina með augun lokuð – og það hafi tekist.

Talsmenn Brother segja að fyrirtækið hafi hætt að framleiða ritvélar í Bretlandi þar sem eftirspurnin eftir þeim hafi hríðfallið. Hins vegar sé enn eftirspurn eftir þeim í Bandaríkjunum og verksmiðjan í Asíu anni allri eftirspurn. Verksmiðjan í Wrexham verði þó áfram notuð til endurvinnslu á prenthylkjum og til framleiðslu á öðrum skrifstofuvörum.

Rachel Boon, talskona Vísindasafnsins, segir starfsfólk safnsins himinlifandi yfir gjöfinni og að hún muni sóma sér vel meðal hinna 200 ritvéla sem safnið eigi nú þegar.

„Þessi gjöf táknar lok ritvélaframleiðslu í Bretlandi sem staðið hefur yfir í 130 ár og hefur haft áhrif á svo marga," sagði Boon. „Þessi vél gefur okkur tækifæri til að sýna hvernig samskiptatækninni hefur fleygt fram."

William Burt fann upp fyrstu ritvélina árið 1830 en þær urðu ekki að algengar fyrr en í kringum 1870 þegar ChristopherSholes, sem einnig fann upp Qwerty-lyklaborðið, og Carlos Glidden sömdu við Remington um fjöldaframleiðslu á þeim.

Talið er að ritvélin hafi átt stóran þátt í því að konur fóru út á vinnumarkaðinn, að því er segir á vef BBC. Um 1850 unnu um tvö þúsund konur við vélritun en í kringum aldamótin 1900 er talið að 166 þúsund konur hafi haft af því atvinnu.- kh