Falur hættir með Keflavíkurkonur - Sigurður þjálfar bæði liðin

Sigurður Ingimundarson mun þjálfa bæði karla- og kvennalið Keflavíkur Iceland Express deildunum í körfubolta á næsta tímabili en þetta kemur fram á heimasíðu Keflavíkur. Falur Harðarson ákvað að hætta þjálfun kvennaliðsins eftir aðeins eitt ár með liðið en hann stígur til hliðar sökum anna.

Sigurður tók við karlaliði Keflavíkur á ný fyrir síðasta tímabil og gerði liðið að bikarmeisturum í vetur. Hann hefur alls gert meistaraflokka Keflavíkur tíu sinnum að Íslandsmeisturum.

Sigurður þjálfaði kvennalið Keflavík á árunum 1991 til 1996 og liðið varð Íslandsmeistari fjórum sinnum á þessum fimm árum. Hann tók einnig við liðinu í úrslitakeppninni 2004 og gerði liðið að Íslandsmeisturum.

Kvennalið Keflavíkur varð deildarmeistari í vetur en tapaði öllum þremur leikjum sínum í úrslitakeppninni. Keflavík tapaði síðan fyrir verðandi bikarmeisturum Njarðvíkur í framlengdum leik í átta liða úrslitum bikarsins og varð í 2. sæti í Lengjubikarnum.