Kvennalið Keflavíkur styrkir sig með serbneskum bakverði

Kvennalið Keflavíkur hefur styrkt sig fyrir lokaátökin um titlana í kvennakörfunni en serbneski bakvörðurinn Marina Caran mun spila með liðinu það sem eftir er af tímabilinu.

Marina Caran er 26 ára og 164 sm bakvörður samkvæmt upplýsingum á erlendum netmiðlum en Keflvíkingar segja þó í frétt á heimasíðu að hún sé 180 sm á hæð. „Þessi styrking á kvennaliði Keflavíkur er liður í því að ná settum markmiðum á tímabilinu," segir í frétt á heimasíðu félagsins.

Caran lék síðast með þýska b-deildarliðinu Keltern en bandaríski framherji liðsins, Jacqueline Adamshick, spilaði einnig fyrir það félag. Áður en Caran kom til Þýskalands spilaði hún með liðinu ZKK Kovin í Serbíu.

Caran var með 12,9 stig, 2,3 stoðsendingar og 2,3 þrista á 20,1 mínútu að meðaltali í leik með Keltern fyrir áramót. Caran nýtti 36 prósent skota sinna utan af velli þar af setti hún niður 30 prósent skotanna fyrir utan þriggja stiga línuna.