Umfjöllun: Njarðvík jafnaði metin

Njarðvík jafnaði í kvöld metin í einvígi sínu gegn deildarmeisturum Hamars í undanúrslitum úrslitakeppni Iceland Express-deildar kvenna.

Leik Njarðvíkur og Hamars lauk með 86-78 sigri Njarðvíkur. Með þessu jöfnuðu Njarðvíkurstúlkur metin í undanúrslitarimmunni í 1-1 en það þarf þrjá sigra til að komast í úrslitin.

Deildarmeistarar Hamars vann fyrri leikinn í Hveragerði 85-77 og þurftu Njarðvíkingar því nauðsynlega sigur á heimavelli í kvöld.

Julia Demirer var atkvæðamest í liði Njarðvíkur með 32 stig/15 fráköst og næst kom Shayla Fields með 25 stig/9 fráköst. Í liði Hamars var Jaleesa Butler atkvæðamest með 36 stig/8 fráköst og Slavica Dimovska með 15 stig/8 fráköst.

Njarðvík tók snemma tökin á leiknum og náðu 8 stiga forystu í stöðunni 23-15 en Hamarsstúlkur voru fljótar að svara og minnka muninn. Fyrsta leikhluta lauk þegar Njarðvík hafði 26-23 forystu. Jaleesa Butler var atkvæðamest með 13 stig fyrir Hamar en Julia Demirer var með 8 fyrir Njarðvík.

Hamarsstúlkur hófu annan leikhluta vel og náðu forystu um miðbik hálfleiksins en Njarðvík tóku þá við sér og voru fljótar að ná aftur forystu sinni sem þær héldu út að hálfleik þar sem staðan var 47-42. Í liði Njarðvíkur var Julia Demirer stigahæst með 15 stig, Shayla Feilds með 12 og Ína María Einarsdóttir með 11. Í liði Hamars voru Jaleesa Butler með 17 stig Slavica Dimovska með 13.

Njarðvíksstúlkur komu þó gríðarlega ákveðnar út í þriðja leikhluta og juku smátt og smátt muninn sem varð mest 15 stig. Skemmtilegt atvik átti sér stað um miðjan leikhluta þegar Jón Guðmundsson dómari þurfti leikhlé enda datt sólinn undan hælnum á honum. Hann var þó fljótur að laga það en Njarðvíkurstúlkur héldu áfram ákafa sínum og héldu 15 stiga forystunni út leikhlutann sem endaði 70-55 fyrir Njarðvík.

Því var ljóst að brekkan var brött fyrir Hamarsstúlkur í fjórða leikhluta og hófu þær endurkomuna of seint, þær náðu minnst að minnka muninn í 7 stig þegar mínúta var eftir af fjórða leikhluta. Njarðvík sá þó út leikinn og unnu 86 - 78 sigur á Hamarsstúlkum og jöfnuðu því einvígið.

Njarðvík-Hamar 86-78 (47-39)Njarðvík: Julia Demirer 32 stig/15 fráköst, Shayla Fields 25 stig, Ina Maria Einarsdótir 11 stig, Dita Liepkalne 8 stig/14 fráköst, Ólöf Helga Pálsdóttir 4 stig, Auður R. Jónsdóttir 3 stig, Anna María Ævarsdóttir 2 stig, Arnina Lena Rúnarsdóttir 1 stig

Hamar: Jaleesa Butler 36 stig, Slavica Dimovska 15 stig, Kristrún Sigurjónsdóttir 13 stig, Fanney Lind Guðmundsdóttir 12 stig, Jenný Harðardóttir 2 stig.