Breskir ökumenn í forystuhlutverkinu

Trúlega er það einhver sárabót fyrir breska íþróttaáhugamenn að tveir Bretar tróna á toppnum á stigalistanum í Formúlu 1. Lið Breta komst ekki áfram á HM í fótbolta, en Lewis Hamilton og Jenson Button halda merki Bretlands á lofti næstu tvær vikurnar. Fyrst er stór og mikil aksturshátíð á Goodwood brautinni í Bretlandi um helgina og svo er keppt á Silverstone brautinni um aðra helgi. Hamilton er með sex stiga forskot á Button og stigamótinu, en Sebastian Vettel er sex stigum á eftir Button. Hamilton náði öðru sæti á eftir Vettel í síðustu keppni og Button varð þriðji og komast þannig á verðlaunapall í þriðja mótinu í röð, rétt eins og Hamilton. Köppunum bresku verður því vel fagnað um helgina á Goodwood, sem er sögufræg braut. "Ég mun aka meistarabílnum mínum, MP-23 og ég á góðar minningar um þann bíl. Hann er fallegur. Yfirbygging fullvaxinn, riffluð dekk og hellingur af gripi. Ég get ekki beðið", sagði Hamilton í frétt á f1.com. Hann mun líka aka fyrrum keppnisbíl Alain Prost og það sama mun Button gera. "Goodwood er frábær staður til að hitta áhangendur sem styðja mig og hvetja. Þegar ég er að vinna (á mótssvæðum) þá getur verið erfitt að taka tíma í að spjalla við fólk, en um þetta snýst Goodwood. Að komast í návígi við fólk og láta það vita að ég kann að meta þau og tek þeim ekki sem sjálfsögðum hlut. Þeirra stuðningur skiptir mig máli og jafnvel þó það sé bara eina helgi, þá er þetta mitt tækifæri til að þakka fyrir á persónulegan hátt", sagði Hamilton.

 Stigastaðan 1 Lewis Hamilton 127 2 Jenson Button 121 3 Sebastian Vettel 115 4 Mark Webber 103 5 Fernando Alonso 98 6 Robert Kubica 83 7 Nico Rosberg 75 8 Felipe Massa 67