Hættir í NFL til að fara að bjarga manns­lífum

Varnarmaðurinn hjá San Francisco 49ers tilkynnti ákvörðun sína í myndbandi sem hann birti á Instagram-síðu sinni.

Huff er að skilja eftir heilmikinn pening á borðinu en hann hefði átt að fá einnar milljónar dala bónus frá 49ers á föstudag fyrir að vera enn á leikmannaskrá eða um 126 milljónir íslenskra króna.

Hvorki stærstur né sterkastur

„Ég er hættur í fótbolta,“ sagði Huff. „Ég byrjaði að spila fótbolta þegar ég var fjögurra ára. Þegar ég var að alast upp var ég hvorki stærstur né sterkastur og átti ekki marga vini. Það eina sem ég hafði var leikurinn. Fótboltinn hélt mér á jörðinni. Hann gaf mér eitthvað til að halda í,“ sagði Bryce Huff.

Huff var ekki valinn í nýliðavali NFL-deildarinnar eftir að hafa spilað með Memphis en samdi við New York Jets árið 2020. Hann var þar í fjögur af sex tímabilum sínum í NFL-deildinni áður en hann skrifaði undir þriggja ára, 51,1 milljóna dala samning við Philadelphia Eagles árið 2024.

Það var verðmætasti samningur sem leikmaður, annar en leikstjórnandi, sem ekki var valinn í nýliðavalinu, hafði gert í sögu NFL-deildarinnar. Honum var skipt til San Francisco 49ers árið 2025.

Getur gefið heiminum meira

Huff er að hætta í fótbolta til að einbeita sér að einhverju stærra.

„Í gegnum allt þetta áttaði ég mig á einu: Fótboltinn hefur verið allt mitt líf,“ sagði Huff í myndbandi sínu. „Ég hef spilað síðan ég var 4 ára, en 27 ára gamall veit ég að ég get gefið heiminum meira en bara fótbolta.“

Þessi Super Bowl-meistari mun einbeita sér að fyrirtækinu sem hann stofnaði, Naberstone. Samkvæmt LinkedIn-síðu Huff stofnaði hann Naberstone í mars 2024.

Markmið fyrirtækisins er að útvega öryggisinnviði til að takast á við vandamál tengd litíumrafhlöðum.

„Þetta verkefni mun bjarga mannslífum,“ sagði Huff á Instagram.