Breytingar á Formúlu 1 2011

FIA tilkynnti í dag nokkrar breytingar á reglum og búnaði sem keppnislið mega nota 2011. Greint er frá málinu á autosport.com í dag. Stærsta atriðið er að Pirelli kemur í stað Bridgestone sem dekkjaframleiðandi, en Pirelli og Michelin kepptust síðustu vikur að ná samningi við FIA og keppnislið í málinu. Málið er hvalreki fyrir fyrirtækið, enda mikið auglýsingagildi samfara samningnum. Þá verður ökumönnum leyft að hafa stillanlegan afturvæng á bílum sínum til að hjálpa til við framúrakstur, en búnaðinn má aðeins stilla fyrir ræsingu og svo eftir tvo fyrstu hringina. Eftir það má stilla vænginn ef ökumenn eru sekúndu á eftir keppninaut. Meðal annarra breytinga er að bílar verða að lágmarki að vera 640 kg í mótum og ef keppependur eru langt yfir viðmiðunarmörkum í fyrstu umferð í tímatökum fá þeir ekki að keppa. Tekið er mið af besta tíma og mega bílarnir ekki vera meira en sjö prósent frá þeim tíma..