KR upp fyrir Val

Þrettánda umferðinn í Iceland Express deild kvenna í körfubolta fór fram í kvöld. KR vann öruggan 77-53 sigur á Val og hirti þar með fjórða sætið af Valsliðinu.

Sigur KR í kvöld var afar dýrmætur því hann fer langt með að tryggja liðinu fjórða og síðasta sætið í A-riðli þegar deildinni verður skipt upp í A- og B-riðil eftir næstu umferð.

Sigur KR í kvöld þýðir að liðið hefur nú betri stöðu í innbyrðisviðureignum við Val. KR á útileik við botnlið Fjölnis eftir í lokaumferðinni, en Valur mætir Keflavík. Valsliðið verður að vinna Keflavík og treysta á að KR tapi fyrir Fjölni til að hirða sætið í A-riðlinum.

Fjögur efstu liðin í deildinni fara í A-riðil eftir næstu umferð og leika innbyrðis heima og heiman og sömu sögu er að segja af fjórum neðstu liðunum. Liðin taka stigin sem þau hafa fengið í deildinni til þessa með sér inn í riðlana.

Tvö efstu liðin í B-riðli komast inn í sex liða úrslitakeppni um Íslandsmeistaratitilinn í vor, en þar mæta þau liðunum fjórum í A-riðlinum.

Sigrún Ámundadóttir var atkvæðamest í liði KR í kvöld með 18 stig og 9 fráköst, Hildur Sigurðardóttir skoraði 10 stig og hirti 11 fráköst og Margrét Kara Sturludóttir skoraði 10 stig.

Hjá Val var Signý Hermannsdóttir með 19 stig, 14 fráköst og 5 varin skot og Þórunn Bjarnadóttir skoraði 15 stig og hirti 10 fráköst.

Haukaliðið er enn í efsta sæti eftir 83-68 sigur á Grindavík í kvöld. Guðbjörg Sverrisdóttir skoraði 21 stig fyrir Hauka, Slavica Dimovska 20, Ragna Brynjarsdóttir skoraði 17 stig og hirti 10 fráköst og Kristrún Sigurjónsdóttir skoraði 16 stig, hirti 11 fráköst og stal 6 boltum.

Pétrúnella Skúladóttir var atkvæðamest hjá Grindavík með 16 stig og 19 fráköst og Helga Hallgrímsdóttir skoraði 12 stig og hirti 11 fráköst.

Keflavík lagði Hamar 95-79 í Keflavík. Birna Valgarðsdóttir skoraði 31 stig og hirti 10 fráköst fyrir Keflavík og Pálína Gunnlaugsdóttir skoraði 27 stig, hirti 9 fráköst og gaf 6 stoðsendingar.

Julia Demirer var atkvæðamest hjá Hamri með 25 stig og 12 fráköst og LaKiste Barkus var með 22 stig, 8 fráköst og 6 stolna bolta.

Loks vann Snæfell stórsigur á Fjölni í uppgjöri botnliðanna þar sem Fjölnisliðið gerði aðeins 12 stig í öllum fyrri hálfleiknum.

Berglind Gunnarsdóttir skoraði 18 stig fyrir Snæfell, Kristen Green 16 og Gunnhildur Gunnarsdóttir 14, en Birna Eiríksdóttir skoraði 16 stig fyrir Fjölni.

Haukar eru á toppnum með 24 stig, Keflavík hefur 20 stig í öðru sæti og Hamar er í þriðja sæti með 18 stig. KR og Valur hafa 14 stig í fjórða og fimmta sæti. Grindavík hefur 8 stig í sjötta sæti og Snæfell og Fjölnir reka lestina með 4 og 2 stig.