Þjóðverjar ekki bjartsýnni í yfir þrjú ár

Bjartsýni Þjóðverja hefur aukist töluvert að undanförnu og samkvæmt nýlegri könnun þar í landi hafa þeir ekki verið bjartsýnni í yfir þrjú ár eða síðan í apríl 2006. Financial Times greinir frá þessu í dag.

Niðurstöður könnunarinnar koma í kjölfar frétta frá því í síðustu viku þar sem hagvöxtur í tveimur stærstu hagkerfum evrusvæðisins var töluvert meiri en reiknað hafði verið með. Þýskaland er stærsta hagkerfi Evrópu, næst á eftir er Bretland og þvi næst Frakkland.

Þýskaland er auk þess stærsta útflutningsþjóð Evrópu en Þjóðverjar virðast vera að njóta góðs af miklum opinberum fjárframlögum stjórnvalda í þýska hagkerfið.

Vonir standa til þess að þriðji ársfjórðungur í Þýskalandi verði enn betri en annar ársfjórðungur samkvæmt mælingum sem yfir 300 sérfræðingar og fjárfestar tóku þátt í.

„Annar ársfjórðungur var líklega aðeins upphafið af miðsumarsspretti," segir Carsten Brzeski, evrópskur hagfræðingur hjá ING bankanum í Brussel.

Búist var við því að þýska hagkerfið myndi dragast saman um allt að 6% á þessu ári en nú segir Axel Weber, forstjóri Bundesbank, við þýsk dagblöð að slíkar spár verði nú að endurskoða en þó sé of snemmt að segja til um enda fjármálakreppunnar.