Birna skoraði 31 stig í sigri Keflavíkur

Þrír leikir voru á dagskrá í Iceland Express deild kvenna í kvöld, einn í A-riðli og tveir í B-riðli.

Í A-riðli vann Keflavík sigur á Hamri 92-83 þar sem Birna Valgarðsdóttir skoraði 31 stig fyrir heimaliðið og Pálína Gunnlaugsdóttir 18, en Julia Demirer fór hamförum hjá Hamri með 34 stigum og 27 fráköstum. Þessi frábæra frammistaða færði henni 53 framlagsstig í leiknum.

Í B-riðli deildarinnar voru tveir leikir. Grindavík lagði Snæfell 78-59 á heimavelli sínum. Pétrúnella Skúladóttir skoraði 24 stig fyrir Grindavík en Kristen Green skoraði 24 stig og hirti 14 fráköst fyrir Snæfell.

Þá vann Valur auðveldan sigur á Fjölni 78-54. Bernadett Toplak skoraði 18 stig fyrir Val en Efernía Sigurbjörnsdóttir var stigahæst hjá Fjölni með 15 stig.

Smelltu hér til að sjá stöðuna í A- og B-riðlum Iceland Express deildar kvenna.