Át hund í mótmælaskyni

Nýjasti gjörningur breska listamannsins Mark McGowans hefur vakið upp hörð viðbrögð í heimalandi hans. Hann snæddi hund af eftirlætiskyni Elísabetar Bretadrottningar í mótmælaskyni við refaveiðar eiginmanns hennar.

Velskir corgi-hundar eru í miklu dálæti hjá konungsfjölskyldunni, sérstaklega drottningunni. Þegar fréttir bárust af því á dögunum að Filippus drottingarmaður hefði barið ref til dauða á veiðum ákvað McGowan að taka til sinna ráða. Hann lét búa til kjötbollur úr corgi-hundi sem hafði nýlega drepist. Í gær át hann svo hundinn á götuhorni í Lundúnum, að eigin sögn til að vekja fólk til umhugsunar hvers vegna fulltrúar þjóðarinnar færu með dýr á þann hátt sem Filippus er sakaður um.

McGowan, sem er grænmetisæta, píndi bollurnar í sig og eftir máltíðina sagðist hann aldrei hafa bragðað viðbjóðslegri fæðu. Myndlistarkonan Yoko Ono var á meðal þeirra sem fengu sér bita en vegfarendur létu sér fátt um finnast.