Blóðug átök á heimastjórnarsvæðunum

Til blóðugra átaka hefur komið á heimastjórnarsvæðum Palestínumanna síðustu tvo sólahringa og hafa þau kostað á annan tug manna lífið, þar á meðal tveggja ára dreng. Viðræðum um myndun þjóðstjórnar hefur enn verið frestað.

Sextán hafa fallið frá því seint á fimmtudagskvöldið, þar á meðal unglingar og eitt barn. Átökin urðu hvað hörðust í Jebaliya flóttamannabúðum í gær.

Það var svo í gærkvöldi sem leiðtogar Hamas og Fatah hvöttu liðsmenn sína til að leggja niður vopn. Við því var ekki orðið.

Til skotbardaga hefur komið víða á svæðinu í nótt og í morgun og ekkert lát virðist ætla að verða á átökunum. Skotið var á hús Mahmouds Abbas, forseta Palestínumanna, en hann sakaði ekki.

Fatah-liðar eru einnig sagðir hafa ráiðst til inngöngu í mosku nærri höfuðstöðvum öryggissveita Hamas og myrt háttsettan leiðtoga samtakanna þar sem hann sat og las í Kóraninum. Því neita liðsmenn Fatah.

Rúmlega fimmtíu Palestínumenn hafa fallið í átökum fylkinganna síðan um miðjan síðasta mánuð en friðsamlegt hafði verið að mestu fyrripart þessarar viku. Forvígismenn samtakanna kenna hvorum öðrum um og hafa hætt viðræðum um skipan þjóðstjórnar. Þær þreyfingar virtust á nokkru skriði þar til í gær.

Abbas heldur enn við áætlun sína um að boða til kosninga fyrr en ella ef ekki takist að mynda þjóðstjórn á næstu vikum.

Hann hefur einnig lýst því yfir að opinberir starfsmenn fái nú laun greidd eftir langa bið. Ísraelar hafi loks endurgreitt skatta sem nemi jafnvirði um tæplega sjö milljarða íslenskra króna. Hluti af því fé verði notaður til þess. Greiðslur til Palestínumanna frá Ísraelum og vesturveldum hafa verið frystar frá því Hamas-liðar voru kosnir til valda fyrir ári. Hluti af fénu hefur nú runnið beint til forsetans.