Vill meiri tíma í Írak

Bush Bandaríkjaforseti bað þjóð sína um að gefa sér meira svigrúm til að ná árangri í Írak í stefnuræðu sinni í gær. Hann ætlar að beita sér fyrir því að á næstu tíu árum dragi Bandaríkjamenn úr olíunotkun sinni um fimmtung.

Þótt þingheimur hafi fagnað George Bush í gær var fögnuðurinn mun lágstemmdari en oftast áður enda eru demókratar nú í meirihluta á Bandaríkjaþingi. Fátt kom á óvart í stefnuræðu forsetans, helst vöktu athygli tillögur um að að draga úr olíunotkun um fimmtung á næstu tíu árum og leggja þeim mun meiri áherslu á þróun og framleiðslu nýrra orkugjafa, sérstaklega etanóls. Kvaðst Bush ætla að fara fram á 250 milljarða króna fjárveitingu frá þinginu næsta áratuginn til þessara mála. Umhverfisvernd er tæpast það sem vakir fyrir forsetanum heldur ráða pólitískar aðstæður hér sjálfsagt mestu. Engin þjóð flytur inn jafn mikla olíu og Bandaríkjamenn megnið af henni kemur frá Venesúela og Mið-Austurlöndum þar sem Bandaríkin eiga fáa vini. Stærstur hluti stefnuræðunnar var hins vegar helgaður málefnum Íraks.

Forsetinn útskýrði nýjar áherslur ríkisstjórnar sinnar í stríðsrekstrinum, meðal annars að senda aukaherlið til landsins, og bað þjóðina um að gefa sér tíma til að sýna fram á að þær myndu skila árangri. Þótt útlitið væri dökkt væri ennþá tími til að snúa taflinu sér í vil.

Demókratar eru andvígir stefnu stjórnarinnar í Írak og ætla í næstu viku að leggja fyrir þingið ályktun þar sem fjölgun hermanna þar er fordæmd. Þolinmæði kjósenda gagnvart forsetanum virðist einnig á þrotum því flestar skoðanakannanir benda til að Bush sé óvinsælasti forseti landsins í hálfa öld, að frátöldum Richard Nixon vikurnar fyrir afsögn sína.