Aftaka Saddams verður tekin upp

Síðustu andartök í lífi Saddams Hússeins verða tekin upp á myndband af írösku stjórninni en þetta staðfesti fréttamaður CBS í dag en allt ferlið, frá undirritun dómsskjala til hengingarinnar, verði fest á filmu. Aðalöryggisráðgjafi Íraka sagði að dagsetningin myndi ekki vera gerð opinber til þess að komast hjá óeirðum.

Írakar, meðlimir herafla bandamanna og alþjóðlegir eftirlitsmenn verða viðstaddir aftökuna en ekki er ljóst hvort að myndbandið verður sýnt í írösku sjónvarpi.

Íraskur embættismaður sagði að undirbúningur væri hafinn til þess að geta framfylgt dómnum fyrir lok þessa mánaðar því þeir vildu að aftökunni væri lokið fyrir eina stærstu hátíð múslima, Eid, sem að er á sama tíma og nýja árið gengur í garð.