Vatnstjón í atvinnuhúsnæði á Akureyri

Mikið vatnstjón varð í atvinnuhúsnæði við Fururvelli á Akureyri þegar rifa kom á brunaslöngu á efri hæðum. Þegar lögregla kom að lá um tíu sentímetra hátt vatnslag yfir öllu á efri hæð hússins og einnig hafði lekið niður á neðri hæðina.

Lögregla segir að það hafi tekið Slökkvilið Akureyrar tæplega fjórar klukkustundir að dæla vatni af gólfum.

Í húsinu eru verkfræðistofur og tölvufyrirtæki. Lögregla segir ljóst að um gífurlegt tjón sé að ræða. Viðvörunarkerfi í húsnæðinu gaf frá sér skilaboð eftir hádegi um að eitthvað væri ekki í lagi.