Ferguson ætlar að snúa við blaðinu

Sir Alex Ferguson, stjóri Manchester United, segir að ekki komi til greina að endurtaka klúðrið frá því í fyrra þegar liðið náði aðeins einu stigi gegn franska liðinu Lille í Meistaradeildinni en það varð öðru fremur til þess að enska liðið féll úr keppni. Liðin mætast nú í 16-liða úrslitum keppninnar og er Lille talið eitt veikasta liðið í þeim hópi.

"Við erum mikið betri núna en við vorum á sama tíma í fyrra og nú er liðið fullt sjálfstrausts. Það skipti okkur engu máli hvaða liði við mættum í 16-liða úrslitum að þessu sinni, því það sem skiptir mestu máli er að við náðum þangað. Nú er kominn tími til að bæta fyrir lélegt gengi síðustu ára í keppninni og sanna að við séum á réttri leið," sagði Ferguson.