Leikmenn Arsenal voru taugaóstyrkir

Arsene Wenger viðurkennir að hans menn hafi verið of varkárir og taugaóstyrkir í kvöld þegar liðið gerði markalaust jafntefli við Porto á útivelli í Meistaradeildinni, en það tryggði liðinu engu að síður efsta sætið í riðlinum.

"Porto spilaði nokkuð vel í kvöld, en restina skirfa ég á þreytu minna manna og taugarnar. Við vorum ekki hugmyndaríkir í sóknarleiknum og tókum ekki áhættur í sóknarleiknum. Það er eitthvað sem gerist oft sjálfkrafa þegar staðan í riðlinum er eins og hún var hjá okkur. Það hefði auðvitað verið hneyksli að falla úr keppni í kvöld og Porto er líka sterkt lið," sagði Wenger en vildi lítið tjá sig um framhaldið í keppninni fyrr en ljóst verður hver mótherji liðsins verður.