Talinn hafa verið á 200 km hraða

Þrítugur karlmaður var mældur á 148 kílómetra hraða á vélhjóli sínu skammt fyrir utan Akureyri í nótt. Þegar lögregla gaf manninum merki um að hún vildi ná af honum tali sinnti hann því engu heldur reyndi að stinga laganna verði af. Þegar komið var í Þelamörk, tæplega 25 kílómetra frá þeim stað þar sem ökumaðurinn varð fyrst á vegi lögreglu, stöðvaði hann hjólið og reyndi að fela sig inni á milli húsa, en án árangurs. Maðurinn var sviptur ökuréttindum á staðnum en lögregla telur að vélhjólið hafi verið á um og yfir 200 kílómetra hraða meðan á eltingaleiknum stóð.