Larry Brown hellti sér yfir nýliða

Larry Brown, nýráðinn þjálfari New York Knicks, las nýliðanum Nate Robinson pistilinn um helgina þegar hann reyndi að kasta boltanum af spjaldinu og troða í leik gegn New Jersey Nets, með sinni fyrstu snertingu í leik með New York Knicks. Larry Brown tók æðiskast á hliðarlínunni og kippti nýliðanum strax af velli og las honum pistilinn. Larry Brown er mjög íhaldssamur þjálfari og er þekktur fyrir að brýna fyrir leikmönnum sínum að "spila á réttan hátt" og vill að menn haldi sig við grundvallaratriðin í leik sínum. Körfuboltasérfræðingar í Bandaríkjunum eru því á einu máli um að nýliðinn hefði geta valið sér margar aðrar betri leiðir til að stimpla sig inn og koma sér í náðina hjá þjálfara sínum.