Toms á góðum batavegi

Bandaríkjamaðurinn David Toms sem hné niður í fyrradag á Lumber Classic mótinu í bandarísku mótaröðinni í golfi er kominn af sjúkrahúsi og stefnir að því að spila í Forsetabikarnum um næstu helgi. Toms kvartaði yfir verk í brjósti og örum hjartslætti en er á góðum batavegi. Ástralinn Stuart Appleby er með eins höggs forystu ellefu undir pari samtals eftir 36 holur. Bandaríkjamennirnir Cameron Beckman og Chris Smith eru jafnir í öðru sæti höggi á eftir. Vijay Singh er sjö höggum á eftir Appleby og Phil Mickelson rétt skreið í gegnum niðurskurðinn á pari.