Tilboðsfrestur lengdur til 17. maí

Einkavæðingarnefnd ákvað í gær að framlengja frest til að skila inn tilboðum í Símann til 17. maí. Á fimmta tug aðila hafa sótt tilboðsgögn. Upphaflegur frestur til að skila inn óbindandi tilboðum í Símann var 6. maí. Einkavæðingarnefnd ákvað á fundi sínum í gær að framlengja þann frest um ellefu daga, til 17. maí. Ástæðan er sögð dráttur á afhendingu útboðsgagna en allir sem fá útboðsgögn í hendur þurfa fyrst að ganga frá svokölluðum trúnaðarsamningi og það tók lengri tíma en áætlað hafði verið. Forsvarsmenn Almennings ehf. höfðu áður óskað eftir því að fresturinn yrði lengdur um einn til tvo mánuði þar sem félagið þyrfti lengri tíma til undirbúnings. Halldór Ásgrímsson, forsætisráðherra hafði þetta um málið að segja eftir að hafa rætt við hópinn á föstudaginn: „Mér skilst nú að þau muni komast að því að tíminn sé rýmri en menn gætu álitið. Einkavæðingarnefnd hefur verið að ganga frá þessum málum og mun síðan fjalla frekar um það eftir helgi.“ Það var sem sagt ljóst fyrir helgi að fresturinn yrði lengdur en Almenningur ehf. telur ellefu daga hins vegar ekki vera nóg. Fulltrúar félagsins munu freista þess að hitta fulltrúa ráðgjafafyrirtækisins Morgan Stanley á fundi til að ræða stöðuna og fá frekari upplýsingar. En eru þau búin að fá útboðsgögnin í hendur? Orri Vigfússon, einn forsvarsmanna Almennings, segir þau ekki hafa fengið gögnin en hann geri ráð fyrir að þau fái þau innann skamms tíma. Aðspurður hvort hópurinn nái að klára tilboð sitt fyrir 17. maí segir Orri að það sé nokkuð öruggt en hópurin hefði kosið að hafa miklu lengri tíma. Allir þeir sérfræðingar sem hópurinn hafi rætt við hafi hvatt hann til að reyna að fá meiri tíma vegna þess að þeir þurfi sjálfir meiri tíma til að átta sig á málinu. Orri bendir á að hópurinn hafi ekki unnið að þessu í marga mánuði eins sumir aðrir og telja megi vinnu hópsins í klukkustundum fremur en mánuðum.