Hófu frumkvæðisathugun á að­komu Jóns í ráðu­neytinu

Þórhildur Sunna segir að nefndin hafi farið fram á að forsætisráðuneytið og matvælaráðuneytið afhendi sér öll gögn er varða aðkomu Jóns Gunnarssonar að verkefnum í matvælaráðuneytinu, þar með talið erindisbréf hans og upplýsingar um ráðningu hans.

Lögum samvkæmt hafa ráðuneytin viku til að skila gögnum til nefndarinnar en Þórhildur Sunna segir að þar sem kosningar séu í nánd og þinglok nálgast óðfluga sé líklegt að málið verði viðfangsefni næsta þings. Ólíkt öðrum þingmálum erfast frumkvæðisathuganir stjórnskipunar- og eftirlitsnefndar Alþingis á milli kjörtímabila.

Greiði fyrir greiða

Heimildin sagði fyrr í vikunni frá leynilegri upptöku huldumanns þar sem Gunnar Bergmann, sonur Jóns Gunnarssonar, fullyrti að faðir hans hafi samþykkt beiðni Bjarna Benediktssonar forsætiráðherra um að þiggja sæti á lista Sjálfstæðisflokksins gegn því að Jón fengi stöðu í matvælaráðuneytinu. Haft var eftir Gunnari í téðum upptökum að Jón hafi ætlað sér að afgreiða leyfi til hvalveiða í matvælaráðuneytinu en að ráðherrar Vinstri grænna hafi staðið í vegi þess.

Bjarni Benediktsson forsætisráðherra hefur hafnað því að um einhvers konar hrossakaup hafi verið að ræða. Hann hafi einfaldlega beðið Jón um að aðstoða hann í matvælaráðuneytinu. Hann beindi þeim tilmælum til ráðuneytisstjórans í síðustu viku að Jón kæmi ekki nálægt afgreiðslu hvalveiðileyfa.

Mikilvægt aðhald

Þórhildur Sunna segir ýmislegt benda til þess að um misnotkun valds hafi verið að ræða.

„Mér fannst mjög mikilvægt að nefndin sem hefur þetta mikilvæga aðhaldshlutverk með ríkisstjórninni og með stjórnvöldum færi af stað í að skoða þetta mál vegna þess að það er ýmislegt sem bendir til þess að þarna hafi verið um misnotkun valds að ræða og þar af leiðandi mikilvægt að þessi nefnd taki þetta mál til ítarlegar skoðunar,“ segir hún.

Ætti að vera lögreglumál

Hún segir Pírata vilja koma upp sérstakri stofnun til að rannsaka möguleg spillingarmál eins og þetta.

„Þetta mál undirstrikar hvað það er bagalegt að við höfum ekki hér þar til gerða stofnun sem hefur það að hlutverki að rannsaka spillingu. Það er eitt af þeim málum sem Píratar hafa sett á dagskrá,“ segir Þórhildur Sunna.

„Auðvitað ætti þetta að vera til rannsóknar hjá þar til bærum aðilum. Þetta ætti að vera til rannsóknar að mínu mati hjá lögreglu sem mögulegt mútubrot. Mögulegt brot á 109. grein almennra hegningarlaga.“