Gattuso vill fara til United

Miðjumaðurinn harðsnúni, Gennaro Gattuso hjá AC Milan, hefur heldur betur komið á óvart með því að lýsa því yfir að hann vilji leika með Manchester United í náinni framtíð, aðeins tveimur dögum áður en Milan tekur á móti United í síðari leik 16-liða úrslita meistaradeildar Evrópu. "Draumur minn er að leika með Manchester United í Englandi", sagði Gattuso í viðtali við breska götublaðið Mail on Sunday. "Ég veit að það er kannski of snemmt að tala um þetta þar sem við (Milan) eigum mjög stóran leik í vændum gegn United en ég hef ávallt hrifist af leik þeirra", bætti Gattuso við sem sagðist taka United fram yfir Chelsea vegna leikvangs þeirra og stærðar á heimsmælikvarða. Forráðamönnum United munu eflaust ekki leiðast þessi tíðindi þar sem þeir fara að huga að því að fylla skarð fyrirliðans Roy Keane, sem mun leggja skóna á hilluna á næstu árum. Gattuson er svipaður leikmaður og Keane, enda ber hann mikla virðingu fyrir Íranum skapheita, og líkir honum við sinn eigin fyrirliða, Paulo Maldini.