„Ég set blóð, svita og tár í þetta og mér finnst ekkert skemmti­legra“

„Þeir voru komnir svolítið á undan okkur en við náðum einhvernveginn að slást og berjast og spila vörnina okkar, þetta var bara ógeðslega gaman,“ sagði Ólafur Ólafsson, leikmaður Grindavíkur, eftir að liðið tryggði sér titilinn í kvöld.

Stjarnan fór með níu stiga forskot inn í hálfleikinn. Aðspurður hvað hafi farið í gegnum huga leikmanna í hálfleik sagði hann:

„Halda áfram að spila vörnina okkar. Við vorum að spila vel á móti þeim, fimm á fimm. Þegar þeir fóru að ná upp hröðum sóknum og hröðum þristum þá eru þeir komnir í sinn leik. Um leið og við náðum að hægja á þeim og spila við þá fimm á fimm á hálfum velli þá vorum við að halda þeim frá körfunni og vorum að spila geggjaða vörn.“

Ólafur setti síðustu fjögur stigin fyrir Grindavík og sigldi þar af leiðandi titlinum heim.

„Þetta var bara geggjuð tilfinning, ég reyni alltaf að skila mínu og það er það sem ég geri fyrir félagið. Ég set blóð, svita og tár í þetta og mér finnst ekkert skemmtilegra.“