Gamlar KR kempur létu ÍR hafa fyrir hlutunum

Nóg var af leikjum í 32-liða úrslitunum í dag og Valsmenn fara sáttir heim á Hlíðarenda eftir tveggja stiga sigur gegn 1. deildar liði Þórs Þorlákshafnar. Lokatölur 90-92, Val í vil. Dwayne Lautier fór mikinn í liði Vals í kvöld með 31 stig. Hinn sextán ára gamli Atli Freyr hélt áfram að heilla með 12 stigum og tíu fráköstum. Auk þess gaf hann þrjár stoðsendingar. Valsmenn komnir áfram í sextán liða úrslitin.

Þá vann Njarðvík sinn fyrsta leik á tímabilinu er liðið hafði betur gegn grönnum sínum í liði Víðis úr Garði. Öruggur sigur Njarðvíkinga staðreynd, lokatölur 62-100. 

KR-ingar höfðu þá betur gegn Skallagrími í Borgarnesi, 101-62 og gamlar kempur félagsins í liði KR B létu Bónus deildar lið ÍR hafa fyrir hlutunum. Lið KR B, sem innihélt þekkt nöfn á borð við Darra Hilmarsson, Finn Atla Magnússon og Brynjar Þór Björnsson hékk lengi vel í ÍR sem fór að lokum með fimm stiga sigur, 89-94. 

Önnur úrslit dagsins:

Afturelding 67-101 Hamar 

Fjölnir 86-95 Höttur 

Aþena/Leiknir 102-70 Vestri 

Selfoss 92-112 Stjarnan

32-liða úrslitum VÍS bikarsins lýkur á morgun með fjórum leikjum.