Telur Þórð hafa mis­skilið en sama tala varð niður­staðan

Þórður Snær, framkvæmdastjóri þingflokks Samfylkingarinnar, skrifaði 28. mars að boðaður skattur á banka ætti að skila ríkissjóði um sex milljörðum króna í nýjar tekjur árið 2027.

Fjárhæðin kom ekki fram í fjármálaáætlun ríkisstjórnarinnar. Fjármála- og efnahagsráðuneytið sagði Vísi þá að áformin væru á hugmyndastigi og ekkert mat lægi fyrir á því hversu miklu skattheimtan ætti að skila.

Í fjárlagafrumvarpinu fyrir árið 2027 er nú lagt til að bankaskatturinn verði hækkaður um 75 prósent. Hækkunin á að skila sex milljörðum króna í viðbótartekjur.

Vísir spurði af því tilefni Daða hvers vegna sama fjárhæð og Þórður nefndi væri nú komin í frumvarpið svarar Daði:

„Ég hef engar skýringar á því.“

Bendir á aukinn hagnað bankanna

Daði stendur engu að síður við þá afstöðu, sem hann tjáði Morgunblaðinu í apríl, að Þórður hafi líklega misskilið upplýsingarnar.

Ráðherrann bendir á að eina sex milljarða talan í gögnunum sem þingflokkar stjórnarflokkanna fengu hafi varðað aukinn hagnað stóru bankanna þriggja.

„Samanlagður hagnaður þeirra nam 94 milljörðum króna og jókst um 6 milljarða frá árinu áður,“ sagði í gögnunum.

Daði segir engar aðrar tölur í gögnunum hafa getað gefið tilefni til þeirrar ályktunar að bankaskatturinn ætti að skila sex milljörðum króna.

Hann svarar hins vegar ekki afdráttarlaust hvort sex milljarða skattheimta hafi verið meðal hugmynda sem kynntar voru ríkisstjórninni. Daði segir minnisblöð og útreikninga hafa verið lögð fyrir ríkisstjórnina en ekki sé unnt að upplýsa hvaða hugmyndir hafi verið þar til umræðu. Fjárhæð og útfærsla bankaskattsins hafi ekki verið samþykkt á þeim tíma.