Fjöldi lög­reglu­bíla veitti Hopp-deilibíl eftir­för

Töluverður viðbúnaður lögreglu er á svæðinu og hafa sírenur heyrst óma víða um borginni. Sést hefur til fjölmargra bifhjóla lögreglu bruna í átt að austurhluta borgarinnar.

Ók Hopp-bílnum utan í lögreglubíl undir áhrifum

Lokað var fyrir umferð á svæðinu tímabundið. Þetta staðfestir Sævar Guðmundsson, varðstjóri hjá lögreglunni á höfuðborgarsvæðinu. Hann segir eftirförina hafa hafist í lágmúlanum eftir að tilkynning barst um glæfrarlegt aksturslag ökumanns í annarlegu ástandi.

Eftirförin gekk alla leið frá Lágmúlanum og að Víðidal þar sem för ökutækisins var stöðvuð. Ekki liggur fyrir að svo stöddu með hvaða hætti förin mannsins var stöðvuð. Grunur leikur á um að ökumaðurinn hafi verið undir áhrifum við aksturinn og var aksturslag hans nokkuð háskalegt en hraðast náði hann 140 kílómetra hraða á klukkustund.

Hopp-deilibíllinn var nokkuð tjónaður að eftirför lokinni en á för sinni keyrði ökumaðurinn utan í þó nokkrar bifreiðar, þar með talið lögreglubíla. Maðurinn var ekki vopnaður og engan sakaði.

Fjöldi lögreglubíla og tjónaður bíll

Nokkrar ábendingar hafa borist fréttastofunni þar sem kemur fram að um eftirför hafi verið að ræða og hafa margir sagst hafa séð Hopp-deilibíl á verulegum hraða eltan af í það minnsta fimm lögreglubílum og tveimur bifhjólum lögreglu.

„Við vorum að keyra sem sagt bara frá Ögurhvarfi, það kemur inn á hringtorgið og þegar ég tek vinstri beygjuna á hringtorginu þá sé ég þessa hvítu Hopp-bifreið koma á örugglega alveg á 120-130 kílómetrum á klukkustund, jafnvel hraðar,“ segir Gunnar Axel Gunnarsson en hámarkshraðinn á svæðinu er áttatíu kílómetrar á klukkustund.

Hann hafi svo tekið eftir því að skráningarplata bílsins hafi verið löskuð eins og bíllinn hafi lent í einhverju smátjóni en ekki liggur fyrir hvort umferðarslysið sem greint var frá hafi tengst tjóninu.

„Í framhaldi koma þarna einhverjir allavega fjórir lögreglubílar, mjög hratt á eftir honum, eitt mótorhjól og síðan í það minnsta tveir ómerktir lögreglubílar sem voru svona 300 metra aftar, greinilega bara að reyna að ná þeim.“

Fleiri sjónarvottar hafa lýst því að bíllinn hafi virst áberandi tjónaður og klesstur. 

Fréttin hefur verið uppfærð.