Fyrr­verandi NBA leik­manni hent út úr húsi á kvenna­leik

Atvikið átti sér stað í þriðja leikhluta leiksins og setti Cloud niður sniðskot sem kallaði fram leikhlé hjá þjálfara Indiana Fever. Við það tækifæri lét Cloud téðan Enes Kanter heyra það þar sem að hann sat við völlinn.

Kanter hefur farið mikinn undanfarnar vikur og mánuði í andstöðu sinni gegn því að transíþróttafólk fái að keppa með konum. Sjálfur hefur hann sagst út á við skilgreina sig sem konu og reynt að fá sig skráðan í nýliðaval WNBA deildarinnar. 

Allt sem á undan var gengið varð til þess að Cloud sá sig knúna til þess að láta Enes Kanter heyra það og þurftu öryggisverðir vallarins að stíga á milli þeirra. 

Kanter var síðan vikið út úr húsi og hélt leikurinn áfram. 

„Ég er að styðja konur og þess vegna er verið að henda mér út,“ lét Kanter síðan hafa eftir sér.

Enes Kanter Freedom spilaði á sínum ferli 748 leiki í NBA deildinni yfir ellefu tímabil. Eftir að ferli hans lauk hefur Kanter helgað sér aktívisma, blandað sér í stjórnmálaumræðu, umræðu um mannréttindi og gagnrýnt NBA deildina fyrir samskipti og samstarf við Kína. Hann kallaði eftir því að Bandaríkin myndu sniðganga Vetrarólympíuleikana í Kína árið 2022 og það var á þeim tíma sem hann bætti orðinu Frelsi (e. Freedom) við nafn sitt.