Lið Tómasar Bents tapaði eftir dramatískar lokamínútur

Hearts náði forystu leiksins á 35. mínútu þegar Oisin McEntee skoraði. Það gekk erfiðlega fyrir Aberdeen að jafna leikinn og var Hearts enn með forystu þegar lítið var eftir af leiknum.

Tómas Bent Magnússon kom inn á eftir 80 mínútna leik og átti að sigla sigrinum heim síðustu tíu mínúturnar. Það átti þó nóg eftir að gerast í leiknum.

Á 90. mínútu náði Aberdeen loks að jafna leikinn eftir látlausar tilraunir. Liðið fékk aukaspyrnu sem Kevin Nilsbet tók og gaf frábæra sendingu í teiginn. Þar skallaði Lewis Mayo boltanum inn af stuttu færi og leikurinn var orðinn jafn.

Að jafna leikinn var ekki nóg fyrir Aberdeen og ætlaði liðið að sækja sigur. Í uppbótartíma braut Stuart Findlay hjá Hearts á Toyosi Olusanya, leikmanni Aberdeen, í teignum og fékk Aberdeen vítaspyrnu undir lokin.

Fyrir brotið fékk Findlay rautt spjald og fór Kevin Nisbet á punktinn og tryggði ótrúlegan endurkomusigur fyrir Aberdeen. Þetta reyndist vera síðasta spyrna leiksins og fagnaði Nisbet skiljanlega vel og innilega eftir sigurinn.