Annað inn­brotið á skömmum tíma: Leiðin­legt að stolið sé frá litla manninum á horninu

Valli Gunnlaugsson, eigandi staðarins, var í fríi úti á landi þegar þetta kom upp, og þurfti að stytta fríið og bruna í bæinn.

„Það var brotist inn, rúðurnar brotnar, og allir peningarnir teknir úr kassanum okkar, og farið beint út,“ segir Valli.

Hann telur að þjófarnir hafi haft með sér á brott 80 til 100 þúsund krónur.

Síðast þegar brotist var inn var vínflöskum stolið. Síðan var sett upp þjófavarna- og myndavélakerfi.

„Það skiptir engu. Þeir passa bara að það sjáist ekki í andlitið á þeim. Þeir fara bara inn og út.“

Pizza 107 er lítill pizzustaður í verslunarkjarna sem oft er kallaður Úlfarsfell.

„Það er rosa leiðinlegt að það sé verið að stela frá litla manninum á horninu,“ segir Valli. „Þó svo að í stóra samhenginu eru þetta ekki háar upphæðir þá skiptir þetta máli fyrir okkur. Það voru engar milljónir teknar, en tíuþúsundkallarnir skipta okkur litla manninn máli.“

Hann segist átta sig á að þeir sem fremji verknað sem þennan séu ekki á góðum stað í lífinu. Þá bendir hann á innbrotsalda virðist nú vera í gangi, sérstaklega í miðbænum.