„Ekkert af þessu gekk og þá líður manni ömur­lega“

Eftir stórt tap í síðustu umferð mátti Þróttur þola tap gegn botnliði Fram á heimavelli. Jóhann Kristinn var því eðlilega langt niðri eftir leik.

„Ég er rosalega sár og svekktur eins og allar stelpurnar og öll sem eru í kringum þetta hjá Þrótti. Þetta er ekki það sem við ætluðum að bjóða upp á í kvöld. Okkar fólk sem kom hingað frekar en að horfa á undanúrslitin á HM átti þetta ekki skilið og við áttum það að okkar mati ekki heldur. Við ætluðum að gera betur og sýna þeim góða frammistöðu, við ætluðum að ná í þrjú stig. Ekkert af þessu gekk og þá líður manni ömurlega. Manni líður eins og maður hafi brugðist og við höfum auðvitað gert það á ákveðinn hátt og það er ekki góð tilfinning.“

Aðspurður hvað hefði farið úrskeiðis í kvöld hafði Jóhann Kristinn eftirfarandi að segja:

„Þetta er svolítið svona leiðindauppskrift. Við náum ekki að taka nægilega góðar ákvarðanir eða búa nægilega mikið til á síðasta þriðjungi. Svo þegar við fáum færi þá náum við ekki að skora. Sóknarleikurinn er ekki nægilega góður, augljóslega því við skorum ekki mark í kvöld á okkar eigin heimavelli. Við höfum verið að reyna að vinna í þessu.

Svo er það þannig að hætta sem við vissum að væri til staðar nýtir sér styrkleika framherja síns sem er góð með bakið í markið. Hún nær að snúa af sér gríðarlega sterkan varnarmann sem er hjá okkur. Við vissum af þessu en þær gerðu þetta frábærlega og börðust fyrir þessu. Framarar eiga heiður skilinn fyrir hvernig þær hafa risið í sumar og þessir tveir sigrar í röð hjá þeim eru til eftirbreytni.

En við þurfum að hugsa okkar gang. Ég er ekki að ná að fá stelpurnar mínar til að sjá og trúa því hvað þær eru góðar því þær eru það. Þær eru ógeðslega góðar en ég er ekki að fá þær til að trúa því við erum að spila verr en við eigum að gera á venjulegum degi.“

Eftir leik kvöldsins er Þróttur með 13 stig í 5. sæti en Fram í 9. sæti með 10 stig.