Af­koma ríkisins nei­kvæð um 182 milljarða

Þetta kemur fram í ríkisreikningi fyrir árið 2025 sem var birtur í dag.

Þar segir einnig að hrein fjármagnsgjöld hafi numið 71 milljarði króna. Matsbreytingar eigna hafi verið 35 milljarðar króna, hlutdeild í afkomu félaga í eigu ríkisins hafi verið jákvæð um einn milljarð og sölutap af fjármálagerningum og ófjárhagslegum liðum verið um átta milljarðar.

Í tilkynningu á vef Stjórnarráðsins um reikninginn segir að árið 2025 hafi einkennst af auknum efnahagslegum stöðugleika í samanburði við árin á undan. Verðbólga lækkaði, kaupmáttur heimila jókst og stýrivextir tóku að lækka.

Haft er eftir Daða Má Kristóferssyni, fjármála- og efnahagsráðherra, að

„árangur af ábyrgð og festu í hagstjórn birtist í vaxandi mæli í efnahagslegum stöðugleika og áþreifanlega í betri hag almennings. Þar skiptir trúverðug stefna í ríkisfjármálum miklu máli.“

„Endurreisn fjárhagslegs styrks ríkissjóðs er ekki að fullu lokið og enn er nokkuð í land til að ná langvarandi verðstöðugleika. Aukin alþjóðleg verðbólga og hækkun alþjóðlegra vaxta á fyrri helmingi árs 2026 valda því að það mun taka heldur lengri tíma að ná fullum árangri í lækkun verðbólgu en vonir stóðu til. Engu að síður erum við vel á veg komin og ásetningur stjórnvalda um að ná efnahagslegum stöðugleika er ótvíræður og birtist hann í fjárlögum ársins 2026 og mun gera enn frekar í fjárlögum fyrir árið 2027. Árangur Íslands er ekki sjálfsagður og þess vegna brýnt að halda áfram á markaðri braut. Það krefst aga, festu og úthalds. Þar munum við ekkert gefa eftir,“ segir hann.

Afkoma ríkissjóðs fyrir árið 2024 var neikvæð um 56 milljarða, og árið þar á undan neikvæð um 81 milljarð.