Lands­bankinn annast skráningu Styrkáss

Styrkás hf. er rekstrarfélag stofnað árið 2022 en dótturfélög þess eru Skeljungur, Klettur, Stólpi og Hreinsitækni, sem saman mynda samstæðu félagsins.

Styrkás hf. greinir frá því í tilkynningu að félagið hafi undirritað verksamninga um ráðgjöf í tengslum við fyrirhugaða skráningu hlutabréfa félagsins á aðalmarkað íslensku kauphallarinnar.

Stefnt sé að skráningu félagsins á öðrum ársfjórðungi 2027.

Þar segir að Landsbankinn hafi verið ráðinn umsjónaraðili með skráningunni og muni annast yfirumsjón með skráningu hlutabréfa Styrkáss í kauphöllina og hlutafjárútboði í tengslum við skráninguna.

Acro verðbréf, Fossar fjárfestingarbanki og Kvika banki hafi verið ráðnir sem söluráðgjafar í fyrirhuguðu útboði í tengslum við skráninguna.

Hlutverk söluráðgjafa sé að veita ráðgjöf við kynningu og fyrirkomulag útboðs ásamt því að aðstoða við sölu hlutafjár í tengslum við skráningu félagsins í kauphöll í samvinnu við umsjónaraðila.