Martin fékk stóra rós í hnappa­gatið

Martin átti frábæra úrslitakeppni þar sem hann skilaði hærri tölum en í deildarkeppninni.

Alba Berlin endaði þriggja ára sigurgöngu Bayern München með mögnuðum endurkomusigri í oddaleik á útivelli.

Martin er einn af þremur leikmönnum Alba í úrvalsliðinu en Bæjarar eiga þar tvo menn. Þýska deildin tilkynnti um fimm manna úrvalsliðið á miðlum sínum.

Martin var með 11,9 stig og 5,7 stoðsendingar að meðaltali í leik í úrslitakeppninni eftir að hafa verið með 11,2 stig og 5,0 stoðsendingar í leik í deildarkeppninni. Ekki eru það margir sem ná að hækka tölur sínar þegar meira er undir í leikjunum og þessum tölum var okkar maður að skila á bara 23,4 mínútum í leik.

Alba Berlin spilaði líka fimmtán leiki í úrslitakeppninni því liðið fór í oddaleik í öllum þremur einvígunum.