Bretar sam­þykkja Wegovy pilluna fyrstir í Evrópu

Í yfirlýsingu frá Novo Nordisk segir að pillan eigi að vera komin í sölu í Bretlandi innan nokkurra vikna. Þar verður lyfið lyfseðilsskylt fyrir fólk sem glímir við offitu og er með BMI-stuðul yfir 30 eða fólk sem er með stuðul yfir 27 og þjáist af minnst einum heilsukvilla tengdum ofþyngd.

Stutt er síðan sagt var frá því að í Bretlandi stæði til að niðurgreiða þyngdarstjórnunarlyf eins og Wegovy fyrir um milljón manns sem væru í hættu á að fá hjartaáfall eða heilablóðfall. Yfirvöld niðurgreiddu Wegovy fyrir einstaklinga í ofþyngd og Ozempic fyrir einstaklinga með sykursýki 2.

Rannsóknir hafa sýnt að lyfin draga úr líkum á hjartaáföllum og heilablóðfalli, óháð þyngdartapi. Þá virðist notkun þeirra samfara öðrum hjartalyfjum draga verulega úr líkunum á því að þeir sem hafa áður fengið hjartaáfall eða heilablóðfall fái þau aftur.

Áður hafði pillan fengið grænt ljós í Bandaríkjunum og Sameinuðu arabísku furstadæmunum.