Hvikar ekki frá bankaskatti þrátt fyrir við­varanir um hærri kostnað lán­taka

Í nýrri skýrslu Intellecon, sem kynnt var á fundinum, segir að skatturinn gæti hækkað kostnað lántaka um tugi þúsunda króna á ári ef kostnaðurinn færist að fullu yfir á viðskiptavini bankanna. Ráðherrann segir brýnasta verkefni stjórnvalda hins vegar að ná tökum á ríkisfjármálum og verðbólgu.

Segja bankana þegar bera þunga skattbyrði

Í skýrslunni segir að íslensku bankarnir búi nú þegar við meiri sértæka skattbyrði en bankar í nágrannalöndunum. Þar er meðal annars vísað til bankaskatts, fjársýsluskatta, eftirlitsgjalda og bindiskyldu hjá Seðlabankanum.

Útfærsla nýja skattsins liggur ekki fyrir en sex milljarðar króna hafa verið nefndir. Samkvæmt útreikningum Intellecon gæti 50 milljóna króna húsnæðislán hækkað um allt að 66 þúsund krónur á ári ef allur kostnaðurinn færist yfir á viðskiptavini bankanna.

Í skýrslunni er þó tekið fram að áhrifin geti einnig komið fram með öðrum hætti, til dæmis í minni arðsemi bankanna eða frekari hagræðingu.

Daði Már segir ljóst að skattlagning hverfi ekki út í loftið.

„Á endanum skiptist öll svona skattlagning á milli eigenda og viðskiptavina, þannig að það er ekki eins og það verði til verðmæti við skattlagningu,“ segir Daði Már.

Segir baráttuna við verðbólgu mikilvægasta verkefnið

Í glærum Benedikts Gíslasonar, bankastjóra Arion banka, kom fram að íslensku bankarnir greiði hlutfallslega hærri skatta en nokkrir norrænir samanburðarbankar, án þess að arðsemin sé óvenjulega há í norrænum samanburði.

Daði Már segir málflutninginn á fundinum ekki breyta afstöðu sinni.

„Við stöndum frammi fyrir þeirri áskorun að skila hallalausum fjárlögum. Við höfum lagt okkur fram um að ná eins miklum árangri og mögulegt er með hagræðingaraðgerðum. Að ná hér niður verðbólgu er langsamlega mikilvægasta verkefni mitt,“ segir hann.

Ráðherrann bendir jafnframt á að ekki sé allt sem bankarnir telji til íþyngjandi kostnaðar bein skattheimta ríkisins. Bindiskylda þýði til dæmis að bankar þurfi að geyma hluta innlána vaxtalausan hjá Seðlabankanum. Hún sé ákvörðun Seðlabankans og hluti af peningastefnunni.

„Viðvarandi verkefni“

Á fundinum sagði Daði Már að til að ná verðbólgu niður þyrfti að taka erfiðar ákvarðanir. Honum var bent á að það nægði ekki að hækka skatta, heldur þyrfti einnig að taka erfiðar ákvarðanir um útgjöld ríkissjóðs.

„Þetta er viðvarandi verkefni,“ sagði Daði Már og bætti við að ríkisfjármálin og verðbólgan væru hans fyrsta forgangsverkefni.