Advania lýkur kaupum á Evolv

„Evolv hefur undanfarin ár drifið sjálfvirknivæðingu fjölda fyrirtækja og stofnana. Gildi Evolv og stefna falla mjög vel að sýn Advania og við hlökkum mikið til að vinna í sameiningu að því að fullnýta þau tækifæri sem nýjasta tækni skapar fyrir viðskiptavini okkar,“ segir Hildur Einarsdóttir forstjóri Advania, í tilkynningu um samrunann.

Í tilkynningu segir að hjá Evolv starfi 30 manna hópur sem verði hluti af teymi 600 sérfræðinga Advania á Íslandi og flytji í höfuðstöðvar fyrirtækisins í Guðrúnartúni síðar á þessu ári.

„Advania samstæðan stefnir hraðbyri að því að vera leiðandi þjónustuaðili fyrir gervigreind og sjálfvirknivæðingu í Norður-Evrópu og byggja kaupin á Evolv undir þá stefnu á Íslandi. Lausnir Evolv hafa nú þegar sannað gildi sitt í umbreytingu innan fjölda fyrirtækja og mun samanlagður kraftur fyrirtækjanna skapa mikið virði fyrir okkar viðskiptavini. Að sama skapi sjáum við fyrir okkur að lausnir Evolv geti þjónustað erlenda viðskiptavini Advania samstæðunnar víðs vegar um Evrópu,“ segir Þórður Ingi Guðmundsson forstöðumaður Gervigreindarseturs Advania.

„Frá stofnun hefur markmið Evolv verið að hjálpa fyrirtækjum að umbreyta rekstri sínum með sjálfvirknivæðingu og snjallri nýtingu tækni. Með því að sameinast Advania fáum við enn sterkari vettvang til að þróa lausnir okkar áfram, styðja stærri og fjölbreyttari hóp viðskiptavina og nýta þau tækifæri sem felast í þeirri umbreytingu sem nú á sér stað á vinnumarkaði,“ segir Eyþór Logi Þorsteinsson, stofnandi Evolv, og Sigurður Davíð Stefánsson, annar stofnandi fyrirtækisins, tekur undir það:

„Við höfum byggt upp einstaka þekkingu og öflugt teymi hjá Evolv og sjáum mikil tækifæri í því að sameina þá sérhæfingu við umfang og innviði Advania. Sameinað fyrirtæki verður í sterkri stöðu til að leiða þróun á sviði sjálfvirknivæðingar og gervigreindar á Íslandi og jafnframt sækja af meiri krafti á erlenda markaði.“