Hækka stýrivexti aftur

Greint er frá ákvörðun peningastefnunefndar Seðlabankans í yfirlýsingu sem birt var klukkan 8:30. Hún hljóðar svo:

„Peningastefnunefnd Seðlabanka Íslands hefur ákveðið að hækka vexti bankans um 0,25 prósentur. Meginvextir bankans, vextir á sjö daga bundnum innlánum, verða því 7,75%. Allir nefndarmenn studdu þessa ákvörðun.

Verðbólga hefur verið yfir 5% það sem af er ári og mælist nú 5,2%. Verðbólguvæntingar hafa hækkað, einkum til skamms tíma. Hækkun þeirra frá því að stríðsátök hófust í Mið-Austurlöndum er þó ekki eins mikil og í kjölfar innrásarinnar í Úkraínu fyrir fjórum árum. Þar vegur þungt að spennan í þjóðarbúinu var töluvert meiri þá.

Samkvæmt nýbirtri spá Seðlabankans eru horfur á minni hagvexti og meira atvinnuleysi en spáð var í febrúar. Mikil hækkun olíu- og hrávöruverðs og viðvarandi innlendur verðbólguþrýstingur hafa á sama tíma leitt til þess að verðbólguhorfur hafa einnig versnað. Efnahagsaðstæður gætu þróast til verri vegar ef truflanir á alþjóðlegum olíumarkaði vara lengur en nú er gert ráð fyrir eða ef kjarasamningum verður sagt upp síðar á árinu.

Í ljósi verri verðbólguhorfa og hárra verðbólguvæntinga telur peningastefnunefnd rétt að hækka vexti bankans. Nefndin er jafnframt tilbúin að herða taumhald peningastefnunnar enn frekar til þess að tryggja hjöðnun verðbólgu að markmiði þótt það gæti hægt enn frekar á efnahagsumsvifum. Mótun peningastefnunnar mun þó sem fyrr ráðast af þróun efnahagsumsvifa, verðbólgu og verðbólguvæntinga.“

Flestir greiningaraðilar sammála um 25 punkta 

Eftir að stýrivextir voru síðast hækkaðir fór verðbólga upp í 5,4 prósent í marsmælingu Hagstofunnar og þá bjuggust flestir við því að vextir yrðu hækkaðir á ný í dag. Í aprílmælingunni fór verðbólga aftur niður í 5,2 prósent en það breytti ekki spám greiningaraðila, sem gerðu langflestir ráð fyrir 0,25 prósentustiga hækkun.

Aðalhagfræðingur Landsbankans sagði til að mynda í kvöldfréttum Sýnar í gær að búast mætti við 25 punkta hækkun. Forsvarsmenn Seðlabankans hefðu gefið skýrt til kynna við síðustu ákvörðun að herða þyrfti taumhaldið. Það þyrfti að gera þó það gæti kælt hagkerfið.

Þá sagði Daði Már Kristófersson, fjármála- og efnahagsráðherra, við fréttastofu í gærmorgun að vaxtahækkun myndi ekki koma honum á óvart.

Vefútsending klukkan 9:30:

Vefútsending með kynningu á yfirlýsingu nefndarinnar fer fram klukkan 9:30 en þar munu þeir Ásgeir Jónsson seðlabankastjóri, Þórarinn G. Pétursson varaseðlabankastjóri peningastefnu gera grein fyrir yfirlýsingu peningastefnunefndar og sitja fyrir svörum. Þá mun Karen Áslaug Vignisdóttur, aðalhagfræðingur bankans og framkvæmdastjóri sviðs hagfræði og peningastefnu, kynna efni Peningamála, sem koma út í dag.