Bikarinn í húsi og leikar að æsast: „Það eiga að vera læti“

Grindvíkingar eru 2-0 yfir í einvíginu fyrir leik kvöldsins í HS Orku höllinni í Grindavík. Bikarinn verður í húsinu og þangað mæta leikmenn Tindastóls með bakið upp við vegg, mega ekki tapa því þá verður bikarinn og Íslandsmeistaratitillinn Grindvíkinga.

Oft hefur verið talað um að ákveðin pressa geti myndast á lið sem mæta til leiks með bikarinn fyrir framan sig í húsinu og tækifæri til þess að hampa honum í leikslok. Ólafur þekkir þá stöðu.

„Maður þekkir það alveg. Það er skrýtið,“ segir Ólafur í samtali við Stefán Árna Pálsson fyrir leik kvöldsins. „En þá fór ég að hugsa þetta aðeins. Þetta er bara eitthvað sem maður þarf að sækja. Eitthvað sem þú þarft að ná í og vinna fyrir. Leggja þig allan fram til þess að sækja það sem þig langar í, eins og með allt annað í lífinu. Við erum klárir. Vonandi verður þetta ekki eitthvað sem hefur áhrif.“

Er pressan komin algjörlega yfir á ykkur núna?

„Við setjum bara pressu á okkur sjálfir. Viljum að það sé pressa á okkur. Vitum að ef við erum á hundrað prósent hraða, hundrað prósent í öllu þá er bara rosalega erfitt að vinna okkur. Við erum mjög spenntir fyrir því að takast á við þetta verkefni.“

„Það á að vera hiti“

Um nóg hefur verið að ræða eftir síðasta leik liðanna í Síkinu og ljóst að mikill hiti er að færast í einvígið. 

DeAndre Kane, stjörnuleikmaður Grindavíkur, var ekki dæmdur í leikbann af aga- og úrskurðarnefnd KKÍ fyrir framkomu sína eftir leik Grindavíkur og Tindastóls í Síkinu á þriðjudag þar sem að hann komst í kast við stuðningsmenn Tindastóls og formann körfuknattleiksdeildar félagsins. Hann fékk 80.000 króna sekt en verður með í kvöld.

Það er að skapast svolítið mikill hiti í þessari seríu. Hvernig áhrif hefur það á þig?

„Ekki nein áhrif. Mér finnst gott að hafa hita. Það á að vera hiti. Það eiga að vera læti. Þetta sýnir bara að mönnum er ekki sama. Það á að vera ástríða þótt það sé kannski verið að fara yfir strikið. Þetta er bara hluti af leiknum. Hætta þessu rugli og áfram gakk. Þetta er ekkert nýtt.“

Viðtalið við Ólaf í heild sinni má sjá í spilaranum hér fyrir ofan. Leikur Grindavíkur og Tindastóls hefst klukkan korter yfir sjö í kvöld. Leikurinn er sýndur í beinni útsendingu á Sýn Sport Ísland.