Hvít-Rússar fái fullt keppnisleyfi en Rússar enn til rann­sóknar

IOC tilkynnir um þetta í ráðleggingum til alþjóða íþróttasambanda sem birtust á heimasíðu sambandsins. Sum íþróttasambönd hafa þó tekið af skarið, alþjóða sundsambandið hefur til dæmis gefið íþróttafólki frá báðum löndum fullt keppnisleyfi á ný.

Íþróttafólki frá Rússlandi og Hvíta-Rússlandi var bannað að keppa í alþjóðlegum keppnum frá því að innrás Rússa í Úkraínu hófst í febrúar 2022. Árið 2023 var íþróttafólki frá Rússlandi og Hvíta-Rússlandi leyft að keppa en aðeins undir hlutlausum merkjum.

Í tilkynningunni tekur IOC fram að sambandið vilji ekki refsa íþróttafólki fyrir aðgerðir stjórnmálafólks, þar með talinn stríðsrekstur.

Þá er einnig tekið fram að síðan árið 2023 hafi íþróttafólk frá Hvíta-Rússlandi fengið að keppa undir hlutlausum merkjum, meðal annars á Ólympíuleikunum í París 2024 og Vetrarólympíuleikunum í Mílanó og Cortina árið 2026, án vandræða.

Samt sem áður er aðildarsamböndum ráðlagt að leyfa Rússum ekki að keppa aftur fyrir hönd Rússlands. IOC segir lyfjamisferli Rússa hafa áhrif á þá ákvörðun. Sambandið sé enn með mál Rússlands til rannsóknar. Rúmlega þrjú hundruð Rússar voru nýlega dæmdir í keppnisbann í kjölfar rannsóknar á gögnum frá lyfjaverksmiðju í Moskvu frá árinu 2019.

Ákvörðunin er tekin nú skömmu áður en inntökuferli fyrir Ólympíuleikana í Los Angeles árið 2028 hefst en hefur ekki úrslitavald um hvort Rússar fái að keppa fyrir hönd Rússlands þar.