Samkeppniseftirlitið ó­gildir sam­runa Ferro zinks og Metals

Í tilkynningu þess efnis á vef Samkeppniseftirlitsins segir að Ferro zink og Metal séu á meðal fárra fyrirtækja hérlendis sem sérhæfa sig í innflutningi og sölu á smíðamálmum með breiðu vöruúrvali málma af margvíslegum stærðum og gerðum. Með því þjónusti báðir samrunaaðilar blikk-, málm- og vélsmiðjur og ýmis iðnfyrirtæki.

Rannsókn Samkeppniseftirlitsins leiði í ljós að samruninn myndi skapa markaðsráðandi stöðu á mörkuðum fyrir ryðfrítt stál og ál, auk þess sem hann myndi auka samþjöppun og fækka burðugum keppinautum á mörkuðum smíðamálma. Þá myndi samruninn styrkja og festa í sessi einokunarstöðu Ferro zinks á markaði fyrir heitsinkhúðun og auka aðgangshindranir fyrir nýja keppinauta.

„Samkeppniseftirlitið telur líklegt að samruninn leiði til hærra verðs og/eða lakari þjónustu fyrir viðskiptamenn. Ekki hefur verið sýnt fram á að mögulegur ávinningur af samrunanum vegi upp á móti skaðlegum áhrifum á markaði eða skili sér til neytenda. Með hliðsjón af framangreindu er það niðurstaða Samkeppniseftirlitsins að samruninn raski samkeppni með umtalsverðum hætti og sé því andstæður samkeppnislögum.“