Gert ráð fyrir að aðildar­við­ræður klárist á kjör­tíma­bilinu

Á nefndarfundinum var Þorgerður Katrín Gunnarsdóttir utanríkisráðherra  meðal annars spurð hvenær væri gert ráð fyrir að mælt yrði fyrir nauðsynlegum breytingum á stjórnarskrá, samþykki Íslendingar að ganga í ESB.

Miðað er við að verði gert undir lok kjörtímabilsins.

„Ef þjóðin segir já, að hún vilji sjá samning, vilji sjá þá kosti og þau tæki og þau tækifæri sem felast í því að eiga þessi samtöl með öllu því sem þeim fylgir, eins og að tryggja yfirráð yfir sjávarauðlindinni, tryggja undirstöður íslensks samfélags en um leið taka virkan þátt með því að eiga sæti við borðið með öðrum Evrópuþjóðum, að þá erum við að sjá að við förum í skýrslugjöf. Síðan verður farið af stað í aðildarviðræður, það verði sent til Evrópusambandsins að við óskum þess að klára eða halda áfram með þær aðildarviðræður sem hafa byrjað og þá er líka um leið hægt að fara í vinnu við stjórnarskrána. Það tekur tíma,“ sagði Þorgerður Katrín á nefndarfundi.

Þjóðaratkvæðagreiðsla um hvort halda eigi viðræðum áfram á að fara fram þann 29. ágúst næstkomandi. Verði samþykkt að ganga til viðræðna stendur til að staðfesta framhald þeirra á formlegri ríkjaráðstefnu milli Íslands og aðildarríkja ESB.

Skýrslugjöfin sem Þorgerður vísaði til felst í því að skýrsla um uppfærð samningsmarkmið verður unnin og lögð fyrir þingið, samkvæmt því sem fram kom á fundinum. Vinna við slíka skýrslu yrði hafin í samvinnu við hagaðila eftir þjóðaratkvæðagreiðsluna í ágúst.

Samningahópur settur á fót

Takist samningar við Evrópusambandið verður boðað aftur til þjóðaratkvæðagreiðslu. Samþykki Íslendingar að ganga í sambandið þarf að gera breytingar á stjórnarskrá og gert er ráð fyrir að samningahópur um lagaleg málefni verði settur á fót. Þá verði kallað til samtals allra flokka um stjórnarskrárbreytingar á breiðari grunni.

Kjörtímabilið klárast eftir ríflega tvö og hálFt ár, eða árið 2028. Allt ferlið með þjóðaratkvæðagreiðslum, aðildarviðræðum og vinnu við breytingar á stjórnarskrá þyrfti því að klára á þeim tíma. Tvö þing þurfa að samþykkja stjórnarskrárbreytingar og næsta þing eftir kosningar þyrfti því að samþykkja breytingarnar á ný.

Þorgerður Katrín ítrekaði á fundinum að engar viðræður væru hafnar.

„Engar aðildarviðræður eru farnar af stað, það er rangt, það er rugl og það er dómadagsdella. Engin samtöl hafa átt sér stað varðandi einhverja fiskveiðikommisera. Bara ekki,“ sagði Þorgerður Katrín Gunnarsdóttir, utanríkisráðherra.