Spá nú enn verra veðri á fimmtu­dag

Viðvörunin sem gefin var út í morgun hljóðaði upp á suðaustan 15 til 23 metra á sekúndu með snjókomu og hríð, fyrst suðvestantil. Um hádegisbil yrði suðvestan 8 til 13 metrar á sekúndu og skúrir suðvestantil.

Í uppfærðri viðvörun segir að suðaustan stormur eða rok, 18 til 28 metrar á sekúndu með talsverðri snjókomu eða slyddu gangi norðaustur yfir landið á fimmtudag. 

Einnig megi búast við mjög hvössum viðhviðum við fjöll, 35 til 45 metrum á sekúndu. 

„Veðrið fer að ganga niður suðvestantil á landinu um hádegi, en norðaustantil á landinu um kvöldið. Samgöngutruflanir eru líklegar, lokanir á vegum og tafir í flugsamgöngum. Fólki er bent á að sýna varkárni og fylgjast með veðurspám.“

Í fyrramálið verði gerðar viðvaranir fyrir hvert spásvæði út frá því hvernig veðurspá er þar og fyrir hvaða tíma viðvörunin gildir.