Almar, Birgir Leifur og Frið­rik Leó með í Mars­fárinu

Aðeins 68 bestu háskólalið Bandaríkjanna eru með í Marsfárinu. Þar af fá 32 lið sjálfkrafa sæti með því að vinna sína svæðisdeild en svo eru 36 lið valin út frá ýmsum þáttum.

Almar og félagar í Miami Ohio háskólanum voru vissulega líklegir til að verða fyrir valinu, í ljósi þess að þeir unnu alla leiki sína í deildarkeppninni, 31 talsins, og enduðu því efstir í Mið-Ameríku deildinni. Þeir féllu hins vegar úr leik í fyrstu umferð í úrslitakeppni deildarinnar og aðeins sigurliðið komst beint inn í Marsfárið. Þess vegna þurftu þeir að bíða og vona.

Niðurstaða valnefndar var svo tilkynnt í gær og nú þurfa leikmenn Miami Ohio ekki lengur að treysta á neina aðra en sjálfa sig. 

Þeir þurfa hins vegar að byrja á að mæta SMU háskólanum á miðvikudaginn, í sérstöku umspili átta lægst skrifuðu skólanna.

Sigur þar myndi tryggja Almari og félögum einvígi við Tennessee í 64-liða úrslitunum sem fram fara á fimmtudag og föstudag.

Friðrik Leó Curtis og félagar í Nebraska Cornhuskers fara í Marsfárið eftir að hafa orðið í 2. sæti deildarkeppninnar í Big 10 deildinni, og fallið þar út í 8-liða úrslitum.

Þeir fara beint í 64 liða úrslitin og mæta þar liði Troy frá Alabama.

Tvítugur Garðbæingur, Birgir Leifur Irving, hefur einnig farið í marsfárið. Fór í fyrra og aftur í ár. Er í litlu hlutverki hjá liði High Point, en samt alltaf í hóp. High Point mætir Wisconsin í fyrstu umferðinni í ár.

Þeir Almar Orri, Birgir Leifur og Friðrik Leó bætast nú í hóp þeirra Íslendinga sem fengið hafa að taka þátt í Marsfárinu sem er svo sannarlega afar vinsælt í Bandaríkjunum. Valsarinn Frank Aron Booker lék þar með Oklahoma-háskólanum fyrir rúmum áratug og svo Grindvíkingurinn Jón Axel Guðmundsson fyrir átta árum, með Davidson háskólanum. Helena Sverrisdóttir og Dagný Lísa Davíðsdóttir hafa einnig afrekað það kvennamegin, sem og Elísabeth Ýr Ægisdóttir sem fór með Liberty-háskólanum í 64-liða úrslitin í fyrra.

Greinin hefur verið uppfærð.